ഇരിട്ടി: മലയോര മേഖലയായ ഇരിട്ടിയിലും പരിസര പ്രദേശങ്ങളിലും വീശിയടിച്ച ശക്തമായ ചുഴിക്കാറ്റിലും കനത്ത മഴയിലും വ്യാപക നാശനഷ്ടം. മേഖലയിൽ ഏഴോളം വീടുകൾ ഭാഗികമായി തകർന്നു. വീടുകൾക്ക് മുകളിൽ മരങ്ങൾ വീണും ശക്തമായ കാറ്റിൽ മേൽക്കൂരകൾ തകർന്നുമാണ് നാശനഷ്ടങ്ങൾ സംഭവിച്ചത്.
മഴയ്ക്കൊപ്പം അപ്രതീക്ഷിതമായി എത്തിയ ചുഴിക്കാറ്റാണ് ജനങ്ങളെ പരിഭ്രാന്തിയിലാക്കിയത്. വീടുകൾക്ക് പുറമെ കാർഷിക മേഖലയ്ക്കും വൻ തിരിച്ചടിയാണ് ഉണ്ടായിരിക്കുന്നത്. ഏക്കർ കണക്കിന് സ്ഥലത്തെ റബ്ബർ, തെങ്ങ്, കവുങ്ങ്, വാഴ തുടങ്ങിയ കാർഷിക വിളകൾ നശിച്ചു. പലയിടങ്ങളിലും വൈദ്യുതി ലൈനുകൾക്ക് മുകളിൽ മരങ്ങൾ വീണതിനെ തുടർന്ന് വൈദ്യുതി ബന്ധം പൂർണ്ണമായും നിലച്ചിരിക്കുകയാണ്.
റവന്യൂ അധികൃതർ സ്ഥലത്തെത്തി നാശനഷ്ടങ്ങൾ വിലയിരുത്തി വരികയാണ്. വരും മണിക്കൂറുകളിലും മഴ തുടരാൻ സാധ്യതയുള്ളതിനാൽ മലയോര മേഖലയിലുള്ളവർ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.
