കേളകം: കൊട്ടിയൂർ,കേളകം, കണിച്ചാർ, മഞ്ഞളാംപുറം മേഖലകളില്‍ അനധികൃത ക്വാറികള്‍ വ്യാപകമാകുന്നതായി പരാതി. പ്രദേശത്ത് പ്രവർത്തിക്കുന്ന ക്വാറികളില്‍ ഒന്നിനു പോലും ലൈസൻസ് ലഭിച്ചിട്ടില്ലെന്നും അനധികൃത ക്വാറികള്‍ പരിസ്ഥിതി മലിനീകരണം വർധിപ്പിക്കുന്നതായും പ്രദേശവാസികള്‍ പറഞ്ഞു.
നിരന്തരമായ ഖനനം മൂലം പ്രദേശത്തെ ജനങ്ങളിലുണ്ടാകുന്ന ബുദ്ധിമുട്ടുകള്‍ അധികൃതർ കണ്ടില്ലെന്ന് നടിക്കുകയാണെന്നാണ് ഇവരുടെ പരാതി. അനധികൃത ചെങ്കല്‍ ക്വാറികള്‍ക്കെതിരെ വില്ലേജ് ഓഫിസർക്കും ജിയോളജി വകുപ്പിനും പരാതി നല്‍കിയെങ്കിലും ഒരു നടപടിയും ഉണ്ടായില്ല.
മഞ്ഞളാംപുറത്ത് വലിയ തോതില്‍ ഖനനം നടത്തിയാണ് ചെങ്കല്‍ ക്വാറികള്‍ പ്രവർത്തിക്കുന്നത്.
ഇതിനെക്കുറിച്ച്‌ അധികൃതർക്ക് അറിവുണ്ടെങ്കിലും ഇവർ മൗനം പാലിക്കുകയാണെന്നാണ് പരാതി. മരങ്ങള്‍ നശിപ്പിച്ച്‌ ഖനനം നടക്കുന്നതിനാല്‍ ചെറിയ മഴ പെയ്താല്‍ തന്നെ ശക്‌തമായ മണ്ണൊലിപ്പാണിവിടെ.
ചെങ്കല്‍ ക്വാറികളില്‍ നിന്ന് ഒലിച്ചിറങ്ങുന്ന ചെളിവെള്ളം സമീപവാസികള്‍ക്ക് ദുരിതമാകുന്നുണ്ട്. നിരവധി പരാതികള്‍ കൊടുത്തെങ്കിലും അധികൃതരുടെയും നാട്ടുകാരുടെയും എതിർപ്പ് അവഗണിച്ച്‌ സ്വകാര്യ വ്യക്തികള്‍ ലൈസൻസ് പോലുമില്ലാതെ ഖനനം നിർബാധം തുടരുകയാണെന്നാണ് ആരോപണം
