ഇരിട്ടി തളിപ്പറമ്പ് സംസ്ഥാന പാത നവീകരിച്ചിട്ടും ഇതിനിടയിലുള്ള ചെറിയ പാലം അപകടകരമായി തുടരുന്നു. ഇരിട്ടി പാലത്തിനും തന്തോട് നിഖിൽ ആശുപത്രിക്കും ഇടയിലുള്ള ഈ ഇടുങ്ങിയ പാലം വാഹനയാത്രികർക്ക് വലിയ ഭീഷണിയാണ്. വീതിയേറിയ റോഡിന് നടുവിൽ ഇടുങ്ങിയ രീതിയിൽ സ്ഥിതി ചെയ്യുന്ന പാലം രണ്ട് വാഹനങ്ങൾക്ക് ഒരേസമയം കടന്നുപോകാൻ ബുദ്ധിമുട്ടുണ്ടാക്കുന്നു.
പാലത്തിന്റെ ഒരുവശത്ത് പഴശ്ശി ജലാശയവും മറുവശത്ത് ആഴമുള്ള തോടുമാണുള്ളത്. തോടിനോട് ചേർന്ന് മുൻപ് നിർമ്മിച്ച സംരക്ഷണ കവചങ്ങൾ വാഹനങ്ങൾ ഇടിച്ച് തകർന്ന് കിടക്കുകയാണ്. പാലത്തിന്റെ വശങ്ങളിൽ കാട് വളർന്നു നിൽക്കുന്നത് ഡ്രൈവർമാരുടെ കാഴ്ചയെ മറയ്ക്കുന്നു. യാതൊരുവിധ സുരക്ഷാ സംവിധാനങ്ങളോ കൈവരികളോ റിഫ്ലക്ടറുകളോ ഇല്ലാത്തത് രാത്രികാലങ്ങളിൽ യാത്ര ദുഷ്കരമാക്കുന്നു.
ഇരിട്ടിയിൽ നിന്നും ഇരിക്കൂർ, തളിപ്പറമ്പ് ഭാഗങ്ങളിലേക്കുള്ള പ്രധാന ഗതാഗത പാതയാണിത്. കൊട്ടിയൂർ വൈശാഖ മഹോത്സവത്തോട് അനുബന്ധിച്ച് ആയിരക്കണക്കിന് വാഹനങ്ങളാണ് ഈ വഴിയിലൂടെ കടന്നുപോകുന്നത്. റോഡ് പരിചയമില്ലാത്ത ഡ്രൈവർമാർ ഈ ഭാഗത്തെത്തുമ്പോൾ അപകടത്തിൽപ്പെടാനുള്ള സാധ്യത ഏറെയാണ്. ആശുപത്രികൾ, ആരാധനാലയങ്ങൾ തുടങ്ങി നിരവധി പ്രധാന സ്ഥലങ്ങളിലേക്ക് കാൽനടയാത്രക്കാരും നിരന്തരം ആശ്രയിക്കുന്ന വഴിയാണിത്.
തകർന്ന കൈവരികൾ പുനർനിർമ്മിക്കാനും കാട് വെട്ടിത്തെളിച്ച് ദൂരക്കാഴ്ച ഉറപ്പാക്കാനും അടിയന്തര നടപടി വേണമെന്നാണ് നാട്ടുകാരുടെയും വ്യാപാരികളുടെയും ആവശ്യം. വലിയൊരു ദുരന്തത്തിന് കാത്തുനിൽക്കാതെ അധികൃതർ അടിയന്തരമായി ഇടപെടണമെന്നും അവർ ആവശ്യപ്പെടുന്നു.
