കൂത്തുപറമ്പ് നിർമ്മലഗിരി കുട്ടിക്കുന്നിൽ മിനി കണ്ടെയ്നർ ലോറിയും കാറും കൂട്ടിയിടിച്ചുണ്ടായ അപകടത്തിൽ യുവ എൻജിനീയർക്ക് ദാരുണാന്ത്യം. കാർ യാത്രികനായ നാഷണൽ ഹെൽത്ത് മിഷൻ എൻജിനീയർ വടകര സ്വദേശി അൽത്താഫ് ആണ് മരിച്ചത്. ഇന്ന് ഉച്ചയ്ക്ക് രണ്ട് മണിയോടെയായിരുന്നു അപകടം സംഭവിച്ചത്.
മട്ടന്നൂർ ഭാഗത്തുനിന്നും കൂത്തുപറമ്പ് ഭാഗത്തേക്ക് വരികയായിരുന്ന കാറും എതിർദിശയിലേക്ക് പോവുകയായിരുന്ന മിനി കണ്ടെയ്നർ ലോറിയും കൂട്ടിയിടിക്കുകയായിരുന്നു. അപകടത്തിൽ കാർ പൂർണമായും തകർന്നു. കാറിനുള്ളിൽ കുടുങ്ങിപ്പോയ മൂന്നുപേരെയും നാട്ടുകാരും കൂത്തുപറമ്പ് ഫയർഫോഴ്സും പൊലീസും ചേർന്ന് പുറത്തെടുത്ത് ആശുപത്രിയിൽ എത്തിച്ചെങ്കിലും അൽത്താഫിന്റെ ജീവൻ രക്ഷിക്കാനായില്ല.
പൊതുമേഖലാ സ്ഥാപനമായ എച്ച്.എൽ.എല്ലിന്റെ കൺസൾട്ടന്റ് യതുകൃഷ്ണ, കാർ ഡ്രൈവർ പ്രമോദ് എന്നിവർക്കാണ് പരിക്കേറ്റത്. ഇവർ കണ്ണൂരിലെ സ്വകാര്യ ആശുപത്രിയിൽ ചികിത്സയിലാണ്. അപകടത്തെ തുടർന്ന് കൂത്തുപറമ്പ് - മട്ടന്നൂർ റോഡിൽ ഗതാഗതം തടസ്സപ്പെടുകയും, പിന്നീട് പൊലീസ് വാഹനങ്ങൾ നീക്കം ചെയ്തും ഫയർഫോഴ്സ് റോഡിൽ പരന്ന ഓയിൽ കഴുകി നീക്കിയുമാണ് ഗതാഗതം പുനസ്ഥാപിച്ചത്.
