ഇരിട്ടി: പുതുവർഷ ആഘോഷങ്ങളുടെ ഭാഗമായി കേരള കർണാടക അതിർത്തിയായ കൂട്ടുപുഴ എക്‌സൈസ്, പോലീസ് ചെക്പോസ്റ്റില്‍ പരിശോധന ശക്തം.
കർണാടകയില്‍ നിന്ന് എത്തുന്ന വാഹനങ്ങള്‍ ഉള്‍പ്പെടെ പരിശോധനക്ക് ശേഷമാണ് കേരളത്തിലേക്ക് കടത്തിവിടുന്നത്. അതിർത്തികളില്‍ എക്‌സൈസ് സ്പെഷല്‍ ഡ്രൈവ് ആരംഭിച്ചതിന് ശേഷം ആറ് എൻഡിപിഎസ് കേസുകളും നിരോധിത പുകയില ഉല്പങ്ങളും മറ്റും കടത്തിയകൊണ്ടുവന്നതിന് 173 കേസുകളും രജിസ്റ്റർ ചെയ്തിട്ടുണ്ട്.
എൻഡിപിഎസ് കേസില്‍ രണ്ട് തവണ കൊമേർഷ്യല്‍ അളവില്‍ എംഡിഎംഎ പിടികൂടിയിരുന്നു. ഇതിന് പുറമെയാണ് പോലീസ് എയ്ഡ്‌പോസ്റ്റിലും പരിശോധനയില്‍ എംഡിഎംഎ പിടികൂടിയത്. പുതുവർഷം ആഘോഷിക്കാൻ കൂടുതല്‍ ആളുകള്‍ എത്തുന്നത് ചെക്പോസ്റ്റുകളില്‍ ഓരോ വാഹനവും പരിശോധിക്കുക എന്നത് കടുത്ത പ്രയോഗിക ബുദ്ധിമുട്ടുകള്‍ക്ക് കാരണമാകുന്നുണ്ട്. കൂടുതല്‍ വാഹനങ്ങള്‍ നിർത്തി പരിശോധിക്കനുള്ള സ്ഥലപരിമിതും ചെക്പോസ്റ്റിലെ പരിശോധനകള്‍ക്ക് തടസം സൃഷ്ടിക്കുന്നുണ്ട്. അതിർത്തി കടന്നുവരുന്ന വാഹനങ്ങളുടെ അമിത വേഗതയും മറ്റൊരു പ്രതിസന്ധിയാണ്.
