മട്ടന്നൂർ: കണ്ണൂർ മട്ടന്നൂരില്‍ ഓടിക്കൊണ്ടിരുന്ന ബസില്‍ നിന്ന് യാത്രക്കാരൻ തെറിച്ചു വീണു. കർണാടകയിലെ ദിണ്ടിഗല്‍ സ്വദേശിയായ രംഗരാജനെയാണ് ഗുരുതര പരിക്കുകളോടെ ആശുപത്രിയില്‍ പ്രവേശിപ്പിച്ചിരിക്കുന്നത്.
മൈസൂരുവില്‍ നിന്ന് തലശ്ശേരിയിലേക്ക് വന്ന ബസില്‍ നിന്നാണ് ഇയാള്‍ റോഡിലേക്ക് തെറിച്ചുവീണത്.
അപകടം സംഭവിച്ചിട്ടും നിർത്താതെ പോയ ബസ് നാട്ടുകാർ തട‍ഞ്ഞുവെയ്ക്കുകയായിരുന്നു.
മട്ടന്നൂർ മെരുവമ്പായി പാലത്തിന് സമീപം ഇന്ന് രാവിലെയാണ് മൈസൂരുവില്‍ നിന്ന് തലശ്ശേരിയിലേക്ക് വരുന്ന സ്വകാര്യ ബസില്‍ നിന്ന് ദിണ്ടിഗല്‍ സ്വദേശി തെറിച്ചുവീണത്.
എന്നാല്‍ അപകടമുണ്ടായിട്ടും യാത്രക്കാരനെ സഹായിക്കാനോ രക്ഷപ്പെടുത്താനോ ഉള്ള ശ്രമം ബസ് ജീവനക്കാരുടെ ഭാഗത്തു നിന്നും ഉണ്ടായിട്ടില്ല. സംഭവ സ്ഥലത്ത് നിന്ന് കടന്നു കളയാനായിരുന്നു ഇവർ ശ്രമിച്ചത്.
സംഭവം ശ്രദ്ധയില്‍പെട്ട നാട്ടുകാർ ബസ് തടഞ്ഞു നിർത്തി, പരിക്കേറ്റ രംഗരാജനെ കണ്ണൂരിലെ സ്വകാര്യ ആശുപത്രിയില്‍ പ്രവേശിപ്പിക്കുകയായിരുന്നു. അതേ സമയം ഇയാള്‍ എങ്ങനെയാണ് ബസിനുള്ളില്‍ നിന്നും തെറിച്ചു വീണത് എന്ന കാര്യത്തില്‍ വ്യക്തതയില്ല.
മുഖത്തും കൈകള്‍ക്കും ഗുരുതരമായി പരിക്കേറ്റിട്ടുണ്ട്. ബസ് നാട്ടുകാർ പൊലീസില്‍ ഏല്‍പ്പിച്ചിരിക്കുകയാണ്.
