കൂത്തുപറമ്പ്: കൂത്തുപറമ്പ് കുനിയിൽപാലത്ത് പട്ടാപ്പകൽ വീട്ടിൽ അതിക്രമിച്ചുകയറി സ്ത്രീയെ കത്തികാട്ടി ഭീഷണിപ്പെടുത്തി മോഷണത്തിന് ശ്രമം. കുനിയിൽപാലം സ്വദേശി കെ. ഷെമിത്തിന്റെ വീട്ടിലാണ് സംഭവം നടന്നത്. സംഭവത്തിൽ കൂത്തുപറമ്പ് പോലീസ് അന്വേഷണം ഊർജ്ജിതമാക്കി.
വീട്ടിൽ ആളില്ലാതിരുന്ന സമയത്ത് അതിക്രമിച്ചു കയറിയ അക്രമി, വീട്ടിലുണ്ടായിരുന്ന സ്ത്രീയെ കത്തികാട്ടി ഭീഷണിപ്പെടുത്തി കവർച്ച നടത്താൻ ശ്രമിക്കുകയായിരുന്നു. സ്ത്രീ ബഹളം വെച്ചതോടെ പ്രതി സ്ഥലത്തുനിന്ന് ഓടി രക്ഷപ്പെട്ടു.
വിവരമറിഞ്ഞ് സ്ഥലത്തെത്തിയ കൂത്തുപറമ്പ് പോലീസ് പ്രദേശം വളഞ്ഞ് പരിശോധന നടത്തുകയും തെളിവുകൾ ശേഖരിക്കുകയും ചെയ്തു. അക്രമിയെ കണ്ടെത്താനായി പോലീസിന്റെ ഡോഗ് സ്‌ക്വാഡും വിരലടയാള വിദഗ്ധരും സംഭവസ്ഥലത്തെത്തി ശാസ്ത്രീയ പരിശോധനകൾ പൂർത്തിയാക്കി. പ്രദേശത്തെ സി.സി.ടി.വി. ദൃശ്യങ്ങൾ കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്. സംഭവത്തെത്തുടർന്ന് പ്രദേശത്ത് പോലീസ് പട്രോളിങ് ശക്തമാക്കി.
