Zygo-Ad

കൂട്ടുപുഴയിൽ വാഹന പരിശോധനയ്ക്കിടെ പുഴയിൽ ചാടി കാണാതായ അബ്ദുൽ റഹീമിനായി തിരച്ചിൽ തുടരുന്നു

 


ഇരിട്ടി: കേരളാ - കർണ്ണാടക അതിർത്തിയിലെ കൂട്ടുപുഴ പോലീസ് ചെക്ക് പോസ്റ്റിൽ വാഹന പരിശോധനയ്ക്കിടയിൽ ഓടിപ്പോയി  പുഴയിൽചാടി രക്ഷപ്പെടാൻ ശ്രമിക്കുന്നതിനിടെ കാണാതായ തലശ്ശേരി പൊതുവാച്ചേരി സ്വദേശി  അബ്ദുൾ റഹീമി ( 30 ) നായി തിരച്ചിൽ തുടരുന്നു. വെള്ളിയാഴ്ച്ച വൈകീട്ട് ആറുമണിയോടെയാണ് റഹിം പുഴയിൽ ചാടിയത്.  

പുഴയിൽ ചാടിയ ഉടനെ ഒരു വള്ളിയിൽ പിടിച്ചു നിന്നെങ്കിലും കനത്ത കുത്തൊഴുക്കിൽ പിടിവിട്ട് പുഴയിൽ മുങ്ങിത്താണ് നൂറു മീറ്റർ അകലെയുള്ള കച്ചേരിക്കടവ് പാലം വരെ ഒഴുകിപ്പോകുന്നത്  കണ്ടതായി നാട്ടുകാർ പറയുന്നു.  

രാത്രി എട്ടുമണിവരെ പോലീസും അഗ്നിശമനസേനയും നാട്ടുകാരുടെ സഹായത്തോടെ തിരച്ചൽ നടത്തിയെങ്കിലും കനത്ത മഴയും പുഴയിലെ കുത്തൊഴുക്കും വെളിച്ചക്കുറവും  കാരണം തിരച്ചിൽ നിർത്തിവെച്ചു. 

ശനിയാഴ്ച്ച രാവിലെ ഏഴുമണിമുതൽ ആണ്  തിരച്ചിൽ ആരംഭിച്ചത്. കൂട്ടപുഴ മുതൽ ഇരിട്ടി പാലം വരെ പുഴയുടെ ഇരുകരകളിലുമായി  ശനിയാഴ്ച വൈകുന്നേരം 4 മണി വരെ തിരച്ചിൽ  നടത്തിയെങ്കിലും ഫലം ഉണ്ടായില്ല. 

ഇരിട്ടി അഗ്നി രക്ഷാ നിലയം സ്റ്റേഷൻ ഓഫീസർ ഉണ്ണികൃഷ്ണന്റെ നേതൃത്വത്തിൽ ഇരിട്ടി, പേരാവൂർ, മട്ടന്നൂർ ,കൂത്തുപറമ്പ് യൂണിറ്റുകളിലെ അഗ്നി രക്ഷാ സേന അംഗങ്ങൾ, സിവിൽ ഡിഫൻസ് സംഘം   രണ്ട് ഡിങ്കി ബോട്ടുകളിലായാണ് തിരിച്ചൽ നടത്തിയത്. 

വള്ളിത്തോട് ഒരുമ റെസ്‌ക്യുടീം അംഗങ്ങളും തിരച്ചിലിൽ  ഇവർക്കൊപ്പം കൂടി. കുത്തൊഴുക്കും പാറക്കൂട്ടങ്ങളും കയങ്ങളും നിറഞ്ഞ പുഴയിൽ തിരച്ചിൽ അതീവ ദുഷ്‌കരമാണ്. അടിഒഴുക്ക്‌  ശക്തമായതിനാൽ ഏറെ ദൂരം ഒഴുകിപ്പോകാനുള്ള  സാധ്യതയും അധികൃതർ കാണുന്നുണ്ട്.  

ഇരിട്ടി സിഐ എ.കുട്ടിക്കൃഷ്ണന്റെ നേതൃത്വത്തിൽ എസ്‌ഐ  എം.ജെ. ബെന്നി, എഎസ്‌ഐ  റെജി എന്നിവരുടെ നേതൃത്വത്തിൽ  പോലീസും റവന്യൂ അധികൃതരും സ്ഥലത്തെത്തിയിരുന്നു

റഹീമിനൊപ്പം വാഹനത്തിൽ ഉണ്ടായിരുന്ന ചെറുവാഞ്ചേരി സ്വദേശി ഹാരിസ്, കോഴിക്കോട് മെഡിക്കൽ കോളേജ് സ്വദേശി  നിതിൻ എന്നിവരെ പോലീസ് ചോദ്യം ചെയ്ത് വിട്ടയച്ചു. ആവശ്യമുള്ളപ്പോൾ വിളിച്ചാൽ ഹാജരാകണമെന്ന നിബന്ധനയോടെയാണ് വിട്ടയച്ചത്.  മൂന്ന് പേരും ഗോണിക്കൊപ്പയിൽ നിന്നും കൂട്ടപുഴയിലേക്ക് എത്തിയ കാർ പോലീസ് കസ്റ്റിയിൽവെച്ചു. 

കാറിൽ വിശദമായ പരിശോധന നടത്തിയിരുന്നെങ്കിലും അസ്വഭാവികമായി ഒന്നും കണ്ടെത്താൻ കഴിഞ്ഞിരുന്നില്ല. കാറിന്റെ ഉടമസ്ഥാവകാശത്തെക്കുറിച്ചുള്ള സംശയം നിലനില്ക്കുന്നതിനാലാണ് കാർ പോലീസ് കസ്റ്റഡയിൽവെച്ചത്. കോഴിക്കോട് സ്വദേശിയായ നിതിൻ ലോറിയിലാണ് ഗോണിക്കൊപ്പയിലേക്ക് പോയത്. തിരിച്ച് ഇന്നോവ കാറിലാണ് മൂവരും കൂട്ടപുഴ വരെ എത്തിയത്. ഇതിലെ ദുരൂഹത പോലീസ് വിശദമായി അന്വോഷിക്കുകയാണ്. കാർ കർണ്ണാടകത്തിൽ നിന്നും മോഷണം നടത്തിയതാണോയെന്ന സംശയവും പോലീസിനുണ്ട്. ഞായറാഴ്ച്ച രാവിലെ വീണ്ടും തിരിച്ചൽ ആരംഭിക്കും. അതിന് ശേഷം മറ്റ് നടപടികളെക്കുറിച്ച് ആലോചിക്കുമെന്ന് പോലീസ് പറഞ്ഞു.

വളരെ പുതിയ വളരെ പഴയ