ആറളം: കട്ടിലിനടിയില് ഒളിച്ചിരുന്ന രാജവെമ്പാലയില് നിന്ന് കുടുംബത്തെ രക്ഷിച്ചത് കുഴമ്പു കുപ്പി. കണ്ണൂർ ആറളം ഫാമിലെ പതിനൊന്നാം ബ്ലോക്കിലെ കെസി കേളപ്പന്റെ വീട്ടിലാണ് സംഭവം.
ഇന്നലെ രാത്രി പത്തരയോടെ കേളപ്പന്റെ ഭാര്യ വസന്ത കിടക്കാനായി മുറിയിലെത്തി. ഇവർക്ക് കാലു വേദനയുള്ളതിനാല് കിടക്കുന്നതിന് മുമ്പ് കുഴമ്പ് തേക്കുന്നത് പതിവായിരുന്നു. ഇന്നലെ കുഴമ്പ് തേയ്ക്കുന്നതിനിടെ കുപ്പി കൈയില് നിന്ന് താഴെ വീണു.
കട്ടിലിനടിയിലേക്ക് ഉരുണ്ടുപോയ കുപ്പിയെടുക്കാനായി കുനിഞ്ഞപ്പോഴാണ് അവിടെ എന്തോ ഒന്ന് ചുറ്റിപ്പിണഞ്ഞ് കിടക്കുന്നത് കണ്ടത്. ഇതോടെ സംശയം തോന്നി ടോർച്ച് തെളിച്ചു നോക്കിയപ്പോഴാണ് ചുറ്റിപ്പിണഞ്ഞു കിടക്കുന്നത് രാജവെമ്പാലയാണെന്ന് മനസിലായത്.
ലൈറ്റ് അടിച്ചതോടെ പാമ്പ് അക്രമാസക്തനായി. കേളപ്പനും വസന്തയും മകൻ അനില്കുമാറുമാണ് ഈ സമയം വീട്ടിലുണ്ടായിരുന്നത്. പത്തി വിടർത്തി ചീറ്റിയതോടെ വീട്ടുകാർ ഭയന്ന് പുറത്തേക്കോടി. ഉടൻ തന്നെ വനംവകുപ്പിനെ വിവരമറിയിച്ചു.
ഇരിട്ടി ഫോറസ്റ്റ് സെക്ഷൻ താല്കാലിക വാച്ചറും മാർക്ക് പ്രവർത്തകനുമായ ഫൈസല് വിളക്കോടിന്റെ നേതൃത്വത്തില് പുലർച്ചെ ഒരു മണിയോടെ പാമ്പിനെ പിടികൂടുകയായിരുന്നു. പിന്നീട് ഇതിനെ ഉള്വനത്തില് തുറന്നുവിട്ടു. വീടിന് സമീപത്ത് തോടും മുളങ്കാടുമുണ്ട്. ഇവിടെ നിന്നാകാം പാമ്പ് വന്നതെന്ന് കരുതുന്നത്.
പാമ്പു പിടിത്തക്കാർ എത്തുന്നതു വരെ ഏറെ ഭയപ്പെട്ടാണ് വീട്ടില് കഴിഞ്ഞതെന്നാണ് കുടുംബം പറയുന്നത്. കുപ്പി താഴെ വീണില്ലായിരുന്നുവെങ്കില് കട്ടിലിനടിയില് ഒളിച്ചിരുന്ന പാമ്പിനെ കാണില്ലായിരുന്നവെന്നും കുപ്പിയാണ് തങ്ങളെ രക്ഷിച്ചതെന്നുമാണ് അനില് പറയുന്നത്.
നേരത്തേയും ഇവിടെ രാജവെമ്പാലയെ കണ്ടതായി ചിലർ പറഞ്ഞിരുന്നു. എന്നാല് വീടിനുള്ളില് കയറുന്നത് ആദ്യമാണ്. പ്രദേശത്ത് ഇനിയും രാജവെമ്പാലകള് ഉണ്ടോ എന്ന് സംശയമുണ്ട്.
