കൂത്തുപറമ്പ്: കൂത്തുപറമ്പ് പുറക്കളത്ത് ജനവാസമേഖലയിൽ കാട്ടുപോത്തിറങ്ങി വ്യാപക അക്രമം നടത്തി. പുറക്കളത്തെ 'ഡി.എം. ഹീറോ' (DM Hero) എന്ന ഇരുചക്ര വാഹന ഷോറൂമിന് നേരെയാണ് ശനിയാഴ്ച കാട്ടുപോത്തിന്റെ അക്രമമുണ്ടായത്.
ഷോറൂമിനുള്ളിലേക്ക് ഓടിക്കയറിയ കാട്ടുപോത്ത് സ്ഥാപനത്തിന്റെ മുൻവശത്തെ വലിയ ഗ്ലാസ്സ് ഡോറുകളും അകത്തെ ഫർണിച്ചറുകളും തകർത്തു. ഷോറൂമിനുള്ളിലുണ്ടായിരുന്ന ജീവനക്കാരും ഉപഭോക്താക്കളും അദ്ഭുതകരമായാണ് പരിക്കേൽക്കാതെ രക്ഷപ്പെട്ടത്. വലിയ ശബ്ദത്തോടെ ഗ്ലാസ്സുകൾ തകർന്നതോടെ നാട്ടുകാരും പരിഭ്രാന്തിയിലായി.
വിവരമറിഞ്ഞ് വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. ജനവാസമേഖലയിൽ കാട്ടുപോത്തിറങ്ങിയത് പ്രദേശവാസികളെ വലിയ ഭീതിയിലാഴ്ത്തിയിരിക്കുകയാണ്. കാട്ടുപോത്തിനെ കാട്ടിലേക്ക് തുരത്താനുള്ള നടപടികൾ വനംവകുപ്പ് ഊർജ്ജിതമാക്കി.
