തലശേരി: പ്രായപൂർത്തിയാകാത്ത പതിനേഴുകാരന് കാർ ഓടിക്കാൻ നൽകിയ യുവാവിനെതിരെ പോലീസ് കേസെടുത്തു. കൂത്തുപറമ്പ് മാനന്തേരി സ്വദേശി എം മുഹമ്മദ് ഷഹദിനെതിരെയാണ് (19) തലശേരി പോലീസ് കേസെടുത്തത്. തലശേരി എസ്ഐ വി വി ദീപ്തിയുടെ നേതൃത്വത്തിലുള്ള സംഘമാണ് നടപടി സ്വീകരിച്ചത്.
ശനിയാഴ്ച വൈകിട്ട് അഞ്ചുമണിയോടെ തലശേരി ഇന്ദിരാ പാർക്കിന് സമീപത്തുവെച്ചാണ് സംഭവം നടന്നത്. അപകടകരമായ രീതിയിൽ ഓടിച്ചുവന്ന കെഎൽ 13 എച്ച് 2563 നമ്പർ കാർ പോലീസ് തടഞ്ഞുനിർത്തി പരിശോധിച്ചപ്പോഴാണ് വാഹനം ഓടിക്കുന്നത് പ്രായപൂർത്തിയാകാത്ത ആളാണെന്ന് കണ്ടെത്തിയത്.
ഗൾഫിലുള്ള വാഹന ഉടമയുടെ കാർ നോക്കിനടത്താനുള്ള ചുമതല മുഹമ്മദ് ഷഹദിനായിരുന്നു. ലൈസൻസ് ഇല്ലെന്ന് അറിഞ്ഞിട്ടും യുവാവ് മനഃപൂർവം കാർ പതിനേഴുകാരന് ഓടിക്കാൻ നൽകുകയായിരുന്നുവെന്ന് പോലീസ് കണ്ടെത്തി. ഇതിന്റെ അടിസ്ഥാനത്തിലാണ് യുവാവിനെതിരെ കേസെടുത്തത്.
